عضو مجلس إدارة الأهلي يوجه رسالة لرابطة الأندية بعد الهزيمة من بيراميدز

وجه محمد الدماطي عضو مجلس إدارة النادي الأهلي، طلب لرابطة الأندية، بعد الهزيمة التي تلقاها الأحمر أمام بيراميدز.

نتيجة مباراة الأهلي وبيراميدز:

وخسر الأهلي من نظيره بيراميدز، بنتيجة هدفين دون مقابل، في اللقاء الذي جمع بينهم مساء أمس السبت.

رسالة من الدماطي بخصوص الجمهور:

وكتب الدماطي عبر حسابه على “فيس بوك”:”لأول مرة من خمس سنين حتكلم و أنا عضو مجلس لكن بلسان حالي لوحدي، عشان الأمانة تحتم عليا ده”.

وتابع:” عارف سيل النقد اللي حينزل عليا و تعليقات نقد على الجانب الفني اللي أنا واثق ان شاء الله إنه مع الوقت أكيد حيتصلح”.

وواصل:” ثقتي كاملة في إدارة الكورة على تخطي الصعاب، لكن فكرة إني عيشت حياتي كلها في المدرج تخليني اقول الكلمتين دول”.

نظام دخول الجماهير إلى الاستاد:

وأكد:”لازم إعادة نظر سريعة في نظام دخول الجماهير ، لا نظام الfan Id ولا أسعار التذاكر بتدخل نوعية جمهور الأهلي بتاع زمان”.

تقليل ثمن تذكرة المباريات:

واستكمل:”و لا فئات الشعب اللي بتحب الأهلي و الكورة بجد ، لازم سعر التذكرة ينزل لحد ٢٥ جنيه عشان أي حد يوصل الملعب رايح جاي و ياكل حاجة حيدفع زيهم مرتين”.

واستطرد:”يعني الماتش الواحد حيقف بأقل حاجة ٧٥ جنيه و دة يخلي الناس اللي مرتباتها ٣ و ٤ آلاف جنيه في الشهر يقدر يروح على الأقل ٣ ماتشات في الشهر*

وأشار:” عكس دلوقتي اللي الماتش بيدخل في أقل حاجة ١٥٠ جنية ، نظام الحجز يرجع زي زمان من قدام النادي منافذ”.

واوضح:” شركات الاتصالات كلها مش الرعاة بس و الشراء بالبطاقة و رقم التليفون و يتعمل استعلام أمني”.

واستمر:”لو في مشكلة التذكرة بتقف من على البوابة زي أوروبا ،و تتفتح الملاعب بسعة كاملة”.

واضاف:”احنا مصر و نعرف نأمن أي عدد و في أي وقت مفيش دولة في المنطقة عندها ربع استقرارنا الأمني”.

ويشير:”لو في حاجة حاسس إني مقصر فيها هي إني مش قادر أشوف المدرج مقصور على مجموعة معينة”.

وعن ما حدث في 2011، قال:” ربط الكورة بالسياسة كانت غلط مش حيتكرر تاني إن شاء الله”.

“ومحدش أساساً يقدر يفكر يهز الاستقرار اللي إحنا وصلنا له بعد معاناة رهيبة “.

“دة لو حد حب بس يفكر يدخل سياسة تاني بقية الجمهور هي اللي حتسكتو مش الأمن حتى”.

واختتم:”عظمة النادي الأهلي هي مستمدة من شخصية جمهوره، جمهوره هو جمهور المدرج، لو الشخصية دي مع الوقت تاهت حتبقي خطر كبير على رفعة النادي في المستقبل”.